Pas ngjarjes tragjike që ndodhi të dielën në fshatin Demiraj të Gjilanit, familjarët kanë caktuar për sot ceremoninë e varrimit të dy viktimave, 27-vjeçarit Adonis Demiri dhe foshnjës tremuajshe Dolora Demiri.
Nga kjo ngjarje, të dy viktimat u gjetën pa shenja jete, ndërsa si i dyshuar për rastin është arrestuar babai i 27-vjeçarit, Brahim Demiri, 65-vjeçar, ndaj të cilit të hënën është caktuar masa e paraburgimit.
Sipas njoftimit të familjarëve, ceremonia e varrimit do të mbahet sot, më 3 nëntor 2026, pas namazit të ikindisë, në varrezat e fshatit Demiraj.
“Me dhimbje dhe pikëllim të thellë njoftojmë të gjithë të afërmit, miqtë dhe dashamirët se më datë 01.11.2026 kanë ndërruar jetë Adonis dhe Dolora Demiri”, thuhet në njoftimin e familjes.
Ndërkaq, sipas dyshimeve të hetuesisë, Brahim Demiri dyshohet se pas një konflikti fizik ka privuar nga jeta të birin, ndërsa mbesa e tij, vajza tremuajshe e viktimës, gjithashtu ishte gjetur pa shenja jete.