Arrestimi i ish-drejtoreshës së Shërbimit Informativ të Shtetit, Vlora Hyseni për kryeministrin Edi Rama është shenjë se drejtësia po punon. Në një intervistë për median gjermane VELT, Rama theksoi se institucionet e drejtësisë po japin sinjale të qarta të një shteti funksional.
“Shqipëria ishte një vend ku korrupsioni ishte sistemi. Sot Shqipëria është një vend ku sistemi lufton kundër korrupsionit. Jemi në fazën përfundimtare të pastrimit të vendit”, tha Rama.
Kreu i qeverisë tregoi edhe detaje të bisedave të zhvilluara gjatë vizitës së tij në SHBA. Ai u shpreh se demokratëve amerikanë u ka kërkuar të mos përdorin protestat e “Revolucionit të Flamingove” për të sulmuar presidentin e SHBA, Donald Trump.
“Është hija e gjatë e Donald Trumpit që ka sjellë këtu të gjitha mediat e botës dhe të gjithë të majtën. U thashë miqve të mi demokratë në Amerikë. Nëse nuk mund ta mundni Trumpin në Amerikë, mos ejani në Shqipëri për t’u hakmarrë”, tha Rama.
Sipas shefit të ekzekutivit, projekti i Jared Kushner, shfaqi të vërtetat e miqve dhe armiqve të vendit tonë.
“Po, Rusia është një kërcënim real. Por Kina nuk ka një agjendë perandorake – ajo është thjesht një realitet me të cilin të gjithë duhet të përballen. Nga Turqia nuk vjen asnjë rrezik për Ballkanin Perëndimor. Unë shoh vetëm një ndërhyrje vëllazërore për stabilitet dhe paqe”, tha shefi i qeverisë.
Megjithatë, Shqipëria sipas Ramës, është e detyruar të ndjekë rrugëtimin europian, duke nisur që nga Zvërneci. Madje ai shprehet se është i gatshëm të angazhohet për të hequr të drejtën e vetos pas anetaresimit.