Spitali i Përgjithshëm i Kumanovës ka pranuar pajisje mjekësore në vlerë prej 100.000 eurosh, donacion ky nga Ambasada e Austrisë, i realizuar përmes shoqatës “Vitezat Templarë”, raporton tvfesta.mk
Donacioni përfshin krevate hidraulike spitalore dhe pajisje të tjera me qëllim përmirësimin e kushteve për mjekimin dhe kujdesin ndaj pacientëve.
Drejtori i spitalit, Sasho Stoshevski, theksoi se ky donacion nuk është vetëm ndihmë materiale, por edhe një shembull se si bashkëpunimi mes pushtetit qendror dhe atij lokal, i mbështetur nga shoqatat joqeveritare dhe ambasadat, mund të kontribuojë në avancimin e mbrojtjes shëndetësore për qytetarët e Kumanovës dhe të gjithë Rajonit Verilindor.
Sipas tij, me këtë ndihmë do të rinovohen pajisjet spitalore, veçanërisht krevatet në repartin e internës, kirurgjisë dhe neurologjisë, ku nevojat janë më të mëdha, e më pas edhe në repartet e tjera, duke ndërtuar hap pas hapi një shëndetësi më cilësore.
Kryetarja e shoqatës “Vitezat Templarë”, Gordana Zeçeviq, informoi se donacioni përfshin 40 krevate hidraulike me dyshekë, komodina dhe 19 ngrohëse. Ajo bëri të ditur se kjo është vetëm një pjesë e ndihmës, ndërsa në pranverë pritet edhe një donacion tjetër i madh.
Ambasadori austriak, Martin Palmer, nëstabilizoi se ky donacion është vazhdimësi e bashkëpunimit të suksesshëm mes dy vendeve, veçanërisht me Kumanovën, duke kujtuar se qyteti më parë ka pranuar edhe automjete zjarrfikëse nga krahina austriake e Tirolit.
Falënderime për këtë iniciativë shprehu edhe kryetari i Komunës së Kumanovës, Maksim Dimitrievski. Vlen të potencohet se në pjesën e parë të këtij projekti muajin e kaluar u siguruan 16 krevate spitalore, ndërsa i gjithë procesi u realizua në bashkëpunim edhe me shoqatën e qytetarëve “DROM” nga Kumanova. /tvfesta