Deklaratat e Daut Haradinajt se natën e votimit të ndryshimeve në Ligjin për Dhomat e Specializuara deputetët rrezikonin të përballeshin me gjakderdhje nëse nuk do të votohej ligji, kanë nxitur debat mbi vendimin e kryeministrit Albin Kurti për ta mbështetur atë.
Ndërsa, Haradinaj ka pretenduar se protestuesit ishin të armatosur dhe se situata mund të përshkallëzohej me pasoja tragjike, veprimtari Adem Lushaj vlerëson se vendimet politike në momente të tilla duhet të shqyrtohen duke pasur parasysh jetën e qytetarëve dhe rrethanat konkrete.
Në anën tjetër, analisti politik Faton Mehmeti pretendon se kishte pasur një skenar për destabilizimin e vendit dhe rrëzimin e Kurtit, duke kërkuar ndërhyrjen e Prokurorisë për zbardhjen e plotë të ngjarjes.
Por, sa mund të ndikojnë këto deklarata në vlerësimin e vendimit të Kurtit dhe a ekzistojnë fakte që i mbështesin pretendimet për një plan të mundshëm destabilizues?
Këto çështje kërkojnë shqyrtim të paanshëm dhe verifikim nga organet kompetente, në mënyrë që përgjegjësia politike të vlerësohet mbi bazën e fakteve dhe jo vetëm të deklaratave publike.
Lushaj thotë se përgjegjësia e një lideri politik matet me aftësinë për të marrë vendime të vështira në momente të tensionuara
Së pari, Adem Lushaj, duke komentuar vendimin e kryeministrit Albin Kurti në rrethanat e përshkruara nga Daut Haradinaj, vlerëson se përgjegjësia e një lideri politik nuk matet vetëm me qëndrueshmërinë në qëndrime, por edhe me aftësinë për të marrë vendime të vështira në momente të tensionuara, kur rrezikohen jeta e qytetarëve dhe stabiliteti institucional.
Sipas Lushajt, nëse situata ka qenë ashtu siç e ka përshkruar Haradinaj, atëherë shmangia e një përplasjeje me pasoja tragjike duhet të merret seriozisht gjatë vlerësimit të vendimit të Kurtit.
“Përgjegjësia e një lideri politik matet jo vetëm me qëndrueshmërinë në qëndrime, por edhe me aftësinë për të marrë vendime të vështira në momente të tensionuara, kur rrezikohet jeta e qytetarëve dhe stabiliteti institucional”, shprehet Lushaj për “Bota sot”.
Ai thekson se deklaratat publike, megjithatë, nuk janë të mjaftueshme për të vërtetuar të gjitha rrethanat e asaj nate, ndaj, sipas tij, vlerësimi duhet të bëhet mbi bazën e fakteve konkrete.
“Nëse situata e përshkruar nga Daut Haradinaj ka qenë e tillë, atëherë shmangia e një përplasjeje me pasoja tragjike duhet të merret seriozisht në vlerësimin e vendimit të Albin Kurtit. Megjithatë, deklaratat e bëra nuk mjaftojnë vetvetiu për t’i vërtetuar të gjitha rrethanat e asaj nate”, deklaron ai.
Lushaj nënvizon se në një shoqëri demokratike, vendimet politike duhet të merren pa kërcënime dhe frikësime, ndërsa jeta e qytetarëve duhet të ketë përparësi ndaj çdo interesi apo kalkulimi politik.
“Në demokraci, vendimet duhet të merren pa kërcënime e frikësime, ndërsa asnjë kalkulim politik nuk duhet të jetë mbi jetën e njerëzve”, thekson Lushaj.
Ai shton se vendimi duhet të analizohet duke marrë parasysh faktet, rrethanat konkrete dhe pasojat që mund të kishte secila alternativë, në mënyrë që vlerësimi të mos mbështetet vetëm në deklarata apo interpretime politike.
Mehmeti pretendon se kishte informacione për një skenar të mundshëm që, sipas tij, synonte rrëzimin e kryeministrit Albin Kurti dhe destabilizimin e vendit
Kurae, analisti politik Faton Mehmeti ka deklaruar se kishte marrë informacione për ngjarjen që natën kur ajo kishte ndodhur dhe se i kishte publikuar ato të nesërmen, në një kohë kur, sipas tij, shumë njerëz nuk u kishin besuar.
Duke komentuar pretendimet për atë që mund të kishte ndodhur në rast se projektligji nuk do të votohej atë natë, Mehmeti në përgjigjen e tij për “Bota sot” pretendon se ekzistonte një plan që situata të përshkallëzohej deri në humbje të jetëve njerëzore.
“Qysh atë natë kur ka ndodhur ngjarja, të nesërmen e kam pasur informacionin dhe e kam publikuar në një kohë kur njerëzit nuk e kanë besuar si informacion, por ka qenë e vërtetë”, deklaron Mehmeti.
Ai konsideron se, në rast se projektligji nuk do të votohej atë natë, ishte planifikuar që të kishte edhe viktima, me qëllim që kjo situatë të shfrytëzohej si pretekst për rrëzimin e kryeministrit Albin Kurti.
“Ka qenë në plan që, nëse nuk do të ishte votuar atë natë projektligji, ka qenë e planifikuar që të ketë edhe të vdekur, në mënyrë që të merret si pretekst për ta rrëzuar kryeministrin Kurti dhe për të bërë një grushtshtet”, shprehet ai.
Më tej, Mehmeti kërkon që organet e drejtësisë të merren me këto pretendime, duke vlerësuar se Prokuroria duhet të ndërmarrë veprime hetimore për të zbardhur rrethanat e rastit dhe për të identifikuar personat që mund të kenë qenë të përfshirë.
“Kjo është një gjë shumë e vërtetë, por besoj se Prokuroria duhet të intervenojë dhe ta thërrasë Daut Haradinajn, si dhe t’i arrestojë të gjithë ata persona që kanë pasur një plan, një skenar për ta destabilizuar vendin”, përmbylli Mehmeti për “Bota sot”.