Mbeturinat nga Kumanova do të transportohen dhe deponohen përkohësisht në deponinë e Drisllës në Shkup, pasi deponia lokale e Krastës është bllokuar.
Këtë e kanë bërë të ditur Ndërmarrja Publike „Pastërtia dhe Gjelbërimi“ dhe kryetari i Komunës së Kumanovës, Maksim Dimitrievski.
Ai falënderoi kryeministrin Hristijan Mickoski, kryetarin e Shkupit Orce Gjorgjievski dhe drejtuesit e Drisllës për mbështetjen në zgjidhjen e përkohshme të problemit me transportimin dhe deponimin e mbeturinave.
Dimitrievski njoftoi se po punohet intensivisht për sanimin e deponisë së Krastës dhe për tejkalimin e situatës. Ai gjithashtu u kërkoi falje qytetarëve të Kumanovës për problemin me të cilin po përballen si pasojë e bllokadës së deponisë, duke premtuar se do të bëhen përpjekje që situata të zgjidhet sa më shpejt.