Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim në Gjykatën e Posaçme të Shkallës së Parë 17 të pandehur, të akuzuar për trafik ndërkombëtar të lëndëve narkotike dhe përfshirje në grup të strukturuar kriminal.
Sipas njoftimit të SPAK, hetimet kanë dokumentuar tre episode të trafikut ndërkombëtar të narkotikëve, gjatë të cilave autoritetet e Malit të Zi, Turqisë dhe Holandës kanë sekuestruar gjithsej rreth 2 433 kilogramë marijuanë dhe kokainë.
Të pandehurit janë Emiljan Burba, Rexhep Rraja, Ervis Shuli, Bujar Sefa, Marvin Bushati, Jani Çavo, Përparim Rraja, Gazmir Rraja, Sokol Qaja, Aldo Gjini, Bledar Cafi, Endrit Dokle, Zamir Aliaj, Islam Sefa, Hajdar Sefa, Vidjan Baroka dhe Agim Nina.
Emiljan Burba, Rexhep Rraja dhe Ervis Shuli akuzohen për trafikim të lëndëve narkotike në kuadër të grupit të strukturuar kriminal dhe për drejtimin e këtij grupi. Bujar Sefa akuzohet për trafikim të lëndëve narkotike më shumë se një herë dhe pjesëmarrje në grup të strukturuar kriminal, ndërsa Marvin Bushati akuzohet edhe për mbajtje pa leje të armëve dhe municionit.
Të pandehurit e tjerë akuzohen për trafikim të lëndëve narkotike në kuadër të grupit të strukturuar kriminal ose për pjesëmarrje në të. Agim Nina, i njohur edhe me aliasin Lorenc Selmani, akuzohet për trafikim të lëndëve narkotike në bashkëpunim.
Nga hetimet ka rezultuar se më 3 nëntor 2020, autoritetet kompetente të Malit të Zi sekuestruan 1 722 kilogramë marijuanë, të dërguar nga Shqipëria me destinacion përfundimtar Gjermaninë.
Në episodin e dytë, më 26 janar 2021, autoritetet turke sekuestruan rreth 236 kilogramë marijuanë, të dërguar nga Shqipëria drejt Turqisë.
Ndërsa më 23 nëntor 2020, autoritetet e Holandës sekuestruan 475 kilogramë kokainë, të dërguar nga Ekuadori në portin e Vlissingenit.
Sipas SPAK, nga tërësia e hetimeve ka rezultuar se të pandehurit dhe bashkëpunëtorët e tyre janë koordinuar përmes komunikimeve në platformën e enkriptuar “SkyEcc”. Këto komunikime janë administruar nga autoritetet franceze të drejtësisë në kuadër të ndihmës së ndërsjellë juridike.
Prokuroria e Posaçme ka konkluduar se Emiljan Burba, Rexhep Rraja dhe Ervis Shuli dyshohet se kanë pasur rolin e drejtuesve dhe financuesve të veprimtarisë kriminale, ndërsa të pandehurit e tjerë kanë pasur rolin e pjesëmarrësve.
Për identifikimin e bashkëpunëtorëve të tjerë dhe vijimin e hetimeve pasurore, SPAK ka ndarë aktet e procedimit penal nr. 9 të vitit 2024 dhe ka regjistruar procedimin e ri penal nr. 9/1 të vitit 2026.
Hetimet janë kryer në bashkëpunim me autoritetet e drejtësisë në Gjermani, Francë, Holandë, Belgjikë, Mal të Zi, Turqi dhe Ekuador, si dhe me Eurojust, Europol, strukturat e hetimit të Departamentit të Policisë Kriminale dhe Byronë Kombëtare të Hetimit.