Kryeministri Edi Rama, ka prezantuar platformën “Pasqyra e Flamingos”, e cila sipas tij synon t’u japë qytetarëve akses te dokumentet zyrtare dhe informacionet mbi projektet qeveritare.
Rama tha se platforma do të jetë e disponueshme në shqip dhe anglisht dhe se do të nisë me dosjen e Sazan-Zvërnecit.
Sipas tij, qëllimi është që qytetarët të kenë mundësi të shohin dokumentet zyrtare dhe faktet që lidhen me projektet.
Kryeministri tha se në këtë platformë do të përfshihen edhe dosje të tjera qeveritare.
Rama: Faktet janë gjithmonë edhe më shumë nën presionin e dezinformimit, gjysmë të vërtetave apo të informacioneve të paverifikuara. E kemi quajtur “Pasqyra e Flamingos”. Është në të dyja gjuhët, shqip dhe anglisht. Nis me dosjen e Sazan-Zvërnecit dhe do t’u shërbejë të gjithëve. Do t’u shërbejë qytetarëve për të parë çfarë është e shkruar në të gjitha dokumentet zyrtare.
Nga ana tjetër, është e qartë që në këtë “Pasqyrë të Flamingos” ne do të vendosim çdo dosje qeveritare. Dhe jemi duke përgatitur disa tema të tjera, për dosjen KAYO. Një dosje që tashmë përflitet në rrjetet e kanaleve sociale, në media.
“Pasqyra e Flamingos” është një komponent i “Pasqyrë Albania”. Pjesë e “Pasqyrë Albania” do të jetë edhe mundësia për të ndjekur në kohë reale çdo projekt qeveritar, çdo vepër të financuar nga taksat e qytetarëve. Po ashtu, ka edhe një komponent tjetër, që janë pyetjet dhe përgjigjet e mbledhura.
Në “Pasqyrën e Flamingos” nuk ka retorikë, nuk ka përgënjeshtrime që targetojnë burime të ndryshme.