Ministri i Punëve të Brendshme, Ervin Demo, ka deklaruar se garantimi i së drejtës për protestë duhet të shoqërohet me masa konkrete për parandalimin e dhunës dhe mbrojtjen e rendit publik.
Gjatë qëndrimit në San Patrignano të Italisë, ku po merr pjesë në një takim ndërkombëtar për parandalimin e varësive dhe rehabilitimin, Demo zhvilloi bisedime me përfaqësues dhe homologë evropianë, përfshirë nga Italia dhe Franca.
Në fokus të diskutimeve ishte forcimi i sigurisë publike, parandalimi i akteve të dhunshme dhe mbrojtja e qytetarëve, institucioneve dhe pronës publike e private. Sipas ministrit, përvojat e vendeve të Bashkimit Evropian po shqyrtohen për të përmirësuar instrumentet ligjore dhe kapacitetet institucionale në Shqipëri.
Në një deklaratë për mediat pas takimeve, Demo u ndal edhe te situata e krijuar nga protestat e fundit në vend, duke theksuar se liria për të protestuar është një e drejtë kushtetuese, por nuk duhet të përdoret si justifikim për akte dhune.
“E drejta për të protestuar është një e drejtë kushtetuese dhe ne jemi plotësisht të vendosur ta garantojmë dhe ta mbrojmë. Por e drejta për të protestuar nuk është e drejtë për të ushtruar dhunë, për të sulmuar punonjësit e Policisë, apo për të shkatërruar pronën publike, si dhe atë private”, u shpreh ministri.
Kreu i Ministrisë së Punëve të Brendshme bëri të ditur se gjatë bisedimeve me partnerët evropianë u diskutuan mënyrat se si mund të forcohen mekanizmat për garantimin e sigurisë dhe parandalimin e përplasjeve gjatë protestave.
Sipas tij, Italia dhe vende të tjera evropiane kanë ndërmarrë masa konkrete në këtë drejtim, ndërsa institucionet shqiptare po analizojnë përvojat e tyre për të identifikuar hapat që mund të përshtaten në kushtet e vendit.
“Zhvillimet e fundit në Shqipëri kanë nxjerrë në pah nevojën për të ndërmarrë hapa konkretë për forcimin e sigurisë publike dhe parandalimin e dhunës dhe mbrojtjen e qytetarëve dhe pronës”, deklaroi Demo.
Ai nënvizoi se institucionet do të marrin masat e nevojshme në përputhje me ligjin, me synimin për të garantuar rendin dhe sigurinë në të gjithë territorin e Shqipërisë.
Në përfundim të deklaratës, ministri theksoi se mbrojtja e së drejtës për të protestuar dhe garantimi i sigurisë publike nuk janë objektiva që përjashtojnë njëri-tjetrin, por përgjegjësi që duhet të përmbushen njëkohësisht.
“Ne do të garantojmë lirinë e protestës, por njëkohësisht do të marrim të gjitha masat e nevojshme, në përputhje me ligjin, për të garantuar rendin dhe sigurinë e çdo qytetari në të gjithë territorin e Shqipërisë”, u shpreh ai.