Ditëve të fundit gjendje e tij shëndetësore është rënduar prapa grilave! Gati 19 vite i burgosur për rastin “Alfa”, Agim Islami po vuan nga disa sëmundje, për të cilat ka kërkuar ndihmë mjekësore. Bashkëvuajtësi që atëherë ishte i dyshuar për të njëjtin rast, e mandej i liruar në mungesë provash, Ramiz Dauti ngriti shqetësimin, që të merren masa dhe mos t’i ndodh e njëjta si Rexhail Qerimit, i cili ndërroi jetë në qeli.
“Nesër është kontrolli i radhës së Agimit në spitalin e shtetit, dhe ishte gjithashtu për kontroll, pas 20 viteve që i vuan nga sëmundjet që ju kanë paraqit në burg dhe mendoj që duhet të trajtohet më seriozisht çështja e Agimit, gjendja e tij shëndetësore. Ka qenë mirë si një i ri, por duke pasur parasysh që 19 vite është në burg dhe kushtet janë katastrofë brenda në ambientet e burgut, iu është keqësuar gjendja që veç se ka filluar të na shqetësoj 2-3 ditët e fundit”, tha Ramiz Dauti..
Mbrojtja ndër vite ka kundërshtuar vendimet dhe ka kërkuar përsëritjen e gjykimit, ndërsa ka paraqitur edhe një ekspertizë të video incizimit të ngjarjes, të përgatitur në Serbi. Sipas mbrojtjes, kjo ekspertizë mbështet kërkesën për përsëritjen e gjykimit. Gjykata Penale e Shkupit në dhjetor të vitit 2024 e refuzoi kërkesën e Islamit për përsëritjen e gjykimit, ndërsa në prill të vitit 2025 Gjykata e Apelit e refuzoi ankesën ndaj këtij vendimi. Sipas Dautit, ekspertiza nuk u pranua nga gjykata, pasi nuk kishte një ekspert të asaj fushe që do ta verifikonte atë, por ai thotë se nuk do të heqin dorë në kërkim të drejtësisë
Autoriteteve gjithmonë u bëj thirrje që të merren më seriozisht me rastin e Agimit, për shkak se ne kishim dëshmi të re dhe ekspertizën e atij video-incizimi na e refuzuan sepse Maqedonia si shtet në vitin 2026 nuk ka një ekspert, i cili mund të vendos për besueshmërinë dhe vërtetësinë e ekspertizës, për të cilën kemi marr leje nga qeveritë e kaluara që ekspertizën ta bëjmë jashtë shtetit dhe mungesa e një eksperti të tillë, për atë arsye Agimi duhet të ngelet në burg sepse shteti nuk ka një ekspert të tillë”, deklaroi Ramiz Dauti.
Kujtojmë që rasti “Alfa” lidhet me vrasjen e pjesëtarit të njësitit policor “Alfa”, më 26 nëntor 2008, në afërsi të Fakultetit Matematiko-Natyror në Shkup. Agim Islami dhe Rexhail Qerimi u dënuan me burgim të përjetshëm, ndërsa Ramadan Shaqiri me gjashtë vjet burg. Më vonë, edhe Almir Dërplani u dënua me burgim të përjetshëm në mungesë, ndërsa pas ekstradimit të tij nga Kosova u zhvillua procedurë e veçantë. Rexhail Qerimi ndërroi jetë në burgun e Idrizovës më 27 janar 2022, ndërsa Agim Islami vazhdon të vuajë dënimin e përjetshëm.