Diploma, puna dhe mundësia për ta ndërtuar jetën në vendin tënd ishin në qendër të mesazhit të Shaip Kamberit në takimin me të rinjtë intelektualë nga Lugina e Preshevës, shkruan LUGINALAJMI.
Bartësi i listës së “Koalicionit Shqiptar” foli për një shqetësim që e njohin shumë familje në Luginë: të studiosh e të diplomohesh, por pastaj të përballesh me dyer të mbyllura kur kërkon punë.
“Dikush mund të thotë: ‘Unë s’kam nevojë të merrem me politikë’. Ti mos u merr sa të duash, politika ka për t’u marrë me ty”, tha Kamberi.
Për të, kjo lidhje ndihet drejtpërdrejt në jetën e të rinjve. Mosnjohja e diplomave, pengesat në punësim dhe mungesa e perspektivës janë arsye pse, sipas tij, shqiptarët nuk mund të qëndrojnë anash.
“Nuk mund të mbetemi indiferentë ndaj ngjarjeve, sepse ngjarjet po merren me ne. Indiferenca bën dëm”, theksoi ai.
Kamberi nënvizoi edhe rëndësinë e zbatimit të marrëveshjeve, duke vlerësuar se jetësimi i tyre do ta ndryshonte dukshëm gjendjen e shqiptarëve në Luginë.
Në fjalën e tij pati edhe një mesazh shprese. Ai i cilësoi rrethanat aktuale si shumë pozitive dhe veçoi mbështetjen e Republikës së Kosovës.
“Si kurrë më parë, Republika e Kosovës është krah nesh. Dhe kjo do të jetë edhe më konkrete në vitet në vijim”, u shpreh Kamberi, përcjell LUGINALAJMI.
Takimi me të rinjtë intelektualë nga Lugina e Preshevës u mbajt në kuadër të fushatës parazgjedhore për zgjedhjet parlamentare të 25 tetorit./LUGINALAJMI/