Ish-presidenti i Serbisë, Aleksandar Vuçiq, ka akuzuar koalicionin shqiptar se, me ndërmjetësimin e Albin Kurtit, ka arritur marrëveshje me Listën Studentore për përfaqësimin në këshillat zgjedhorë në Serbi.
Ish-presidenti i Serbisë dhe kandidati i Partisë Përparimtare Serbe (SNS) për kryeministër, Aleksandar Vuçiq, ka sulmuar deputetin shqiptar Shaip Kamberi dhe koalicionin e partive shqiptare, duke i akuzuar për bashkëpunim politik me Listën Studentore, pas të cilit, sipas tij, qëndron kryeministri i Kosovës, Albin Kurti, shkruan LUGINALAJMI.
Në një paraqitje përmes rrjetit social Instagram, Vuçiq ka pretenduar se Kurti ka mbledhur përfaqësuesit e partive shqiptare dhe u ka “urdhëruar” të bashkohen në një koalicion për zgjedhjet parlamentare të 25 tetorit.
Sipas tij, pas këtij bashkimi, përfaqësuesit e koalicionit shqiptar u kanë ofruar përfaqësuesve të Listës Studentore vendet e tyre në këshillat zgjedhorë në qytete të ndryshme të Serbisë.
“Kanë bërë marrëveshjen më të rëndësishme, marrëveshje strategjike, marrëveshje koalicioni me Albin Kurtin dhe partitë politike nga Serbia qendrore që i binden atij”, ka deklaruar Vuçiq.
Duke përmendur raste nga Subotica deri në Çaçak, ai ka sulmuar drejtpërdrejt edhe Shaip Kamberin, të cilin e ka quajtur “ekstremist shqiptar”, duke e akuzuar për mbështetjen e pavarësisë së Kosovës dhe të pretendimit se serbët janë “popull gjenocidal”.
Vuçiq ka shkuar edhe më tej, duke pretenduar se Lista Studentore gëzon mbështetjen e Prishtinës, Zagrebit, Sarajevës dhe Podgoricës. Ai u ka bërë thirrje qytetarëve të Serbisë që këto pretendime t’i kenë parasysh kur të votojnë më 25 tetor.
Megjithatë, në deklaratën e tij, Vuçiq nuk ka paraqitur prova që dëshmojnë se bashkimi i partive shqiptare apo bashkëpunimi i pretenduar me Listën Studentore është urdhëruar nga kryeministri i Kosovës, Albin Kurti./LUGINALAJMI/