Komisioni Republikan Zgjedhor (RIK) ka shpallur mbrëmë zyrtarisht listën zgjedhore të pakicës kombëtare shqiptare të quajtur “Koalicioni Shqiptar”, e cila do të garojë në zgjedhjet e parakohshme parlamentare në Serbi, të parapara për 25 tetor 2026.
Koalicionin e përbëjnë Partia për Veprim Demokratik (PVD), Alternativa për Ndryshim (APN), Partia Demokratike (PD), Partia Demokratike Shqiptare (PDSH), Lëvizja për Proces Demokratik (LPD), Lëvizja për Reforma dhe Unioni Demokratik Shqiptar, ndërsa lista përmban gjithsej 10 kandidatë për deputetë.
Lista zgjedhore ishte dorëzuar në RIK nga Rahim Salihi, në emër të koalicionit. Sipas të dhënave të Komisionit, janë dorëzuar gjithsej 6.863 deklarata të mbështetjes së votuesve, prej të cilave 5.988 janë vlerësuar juridikisht të vlefshme.
Anëtarët e RIK-ut votuan njëzëri për shpalljen e listës, duke i njohur njëkohësisht “Koalicionit Shqiptar” statusin e listës zgjedhore të pakicës kombëtare.
Me këtë vendim, “Koalicioni Shqiptar” edhe zyrtarisht hyn në garën për përfaqësimin e shqiptarëve në Kuvendin e Serbisë në zgjedhjet parlamentare të 25 tetorit./LUGINALAJMI/