Një vit pas një prej betejave më të vështira për jetën, Herolinda Kastrioti nga rrethina e Bujanocit sot është mirë, ndërsa rezultatet e kontrollit të fundit tregojnë gjendje të shkëlqyer shëndetësore.
Lajmin e ka bërë të ditur kardiokirurgu i njohur nga Nishi, Dr. Dragan Milliq, i cili ka rikujtuar historinë e Herolindës dhe betejën e jashtëzakonshme të ekipit mjekësor të QKU Nish për t’ia shpëtuar jetën.
Më 6 tetor 2025, atëherë vetëm 25 vjeçe, Herolinda ishte pranuar në QKU Nish në gjendje jashtëzakonisht të rëndë. Ajo kishte një defekt të madh në murin ndarës të zemrës dhe endokardit infektiv të rëndë të valvulës së aortës. Infeksioni kishte shkaktuar komplikime serioze, duke u përhapur përmes qarkullimit të gjakut deri në shpretkë dhe duke e sjellë atë në gjendje të rëndë septike.
Për ta shpëtuar, mjekët në Nish kryen një ndërhyrje jashtëzakonisht komplekse, gjatë së cilës u hapën njëkohësisht kraharori dhe abdomeni. U bë rekonstruksioni i defektit të zemrës, zëvendësimi i valvulës së aortës dhe largimi i shpretkës, e cila ishte kthyer në vatër të infeksionit.
Pas operacionit nisi një betejë e gjatë. Për rreth dy muaj, Herolinda qëndroi nën kujdesin intensiv të mjekëve dhe personelit shëndetësor të QKU Nish. Në dhjetor të vitit të kaluar, LUGINALAJMI kishte raportuar për përmirësimin e saj dhe momentin kur, pas javësh të tëra lufte, ajo po bëhej gati të kthehej në shtëpi, te familja dhe vajza e saj.
Sot, një vit më vonë, historia ka marrë epilogun më të bukur.
“Pas një viti, në kontroll, Herolinda ka rezultate të përsosura dhe tani bën një jetë krejtësisht normale me familjen dhe vajzën e saj”, ka bërë të ditur Dr. Milliq.
Ai ka publikuar edhe një fotografi të Herolindës gjatë kontrollit me Dr. Llella Llazoviq, duke shprehur krenarinë për ekipin e klinikës dhe QKU Nish.
“Jeta nuk ka çmim dhe çdo jetë është dhuratë nga Zoti”, ka shkruar Milić, duke i uruar Herolindës dhe familjes së saj shëndet dhe çdo të mirë në jetë.
Historia e Herolindës, nga gjendja kritike dhe operacioni tejet kompleks në tetor të vitit të kaluar deri te rezultatet e shkëlqyera të sotme, është një histori e luftës për jetën, por edhe e punës dhe përkushtimit të ekipit mjekësor që u kujdes për të./LUGINALAJMI/