Nga tri mandate në Kuvendin e Serbisë, Usame Zurkoliqi kësaj radhe mezi e shpëtoi një të vetëm. Rënia e tij politike, si në vota ashtu edhe në mandate, u pa qartë në zgjedhjet e 25 tetorit. Për ta siguruar ulësen në Beograd, iu desh edhe përsëritja e votimit më 1 nëntor në Gllogovicë të Aleksincit, ku lista e tij, brenda një jave, nga zero vota kërceu në 53, në një vendbanim ku boshnjakët pothuajse nuk janë të pranishëm. Një rezultat që ka ngritur dyshime për blerje votash.
Por, ajo që e bën edhe më interesante këtë histori për Luginën është fakti se Zurkoliqi mori plot 1.089 vota në Preshevë, në një komunë me mbi 97 për qind shqiptarë.
Dhe këtu fillon pjesa tjetër e historisë, ajo e parave dhe projekteve.
Dy organizata nga Lugina figurojnë si përfituese të mbi 4.6 milionë dinarëve nga ministria që drejtonte Zurkoliqi. Organizata „Informohu“ me 2.300.117 dinarë për projektin „Mladi za solidarnost i edukaciju“, ndërsa organizata „Vizija za razvoj i kooperaciju“ me 2.338.083 dinarë për pako ushqimore, higjienike dhe veshmbathje për familjet në nevojë në Bujanoc dhe rrethinë.
Se a kanë arritur këto organizata t’i shpërndajnë pakot dhe ta realizojnë ndihmën e paraparë, ende nuk dihet. Por një gjë është e qartë: Zurkoliqi i mori votat në Preshevë, ndërsa për paratë e projekteve ende po pritet.
Madje, siç bëjnë të ditur për LUGINALAJMI burime brenda organizatave përfituese, ministria që drejtonte Zurkoliqi ende nuk ua ka transferuar mjetet e miratuara. Nëse kjo konfirmohet, i bie që organizatat kanë mbetur duke pritur paratë, ndërsa përfitimin politik Zurkoliqi tashmë e ka siguruar.
A kanë lobuar këto organizata për Zurkoliqin, duke shpresuar në realizimin e projekteve? Kjo mbetet për t’u sqaruar, pasi deri tani nuk ka prova publike që e lidhin drejtpërdrejt financimin me votat.
Ndërkohë, Zurkoliqi, që dikur gëzonte mbështetje shumë më të madhe në Sanxhak, dje u përball me fishkëllima dhe brohoritje kundër tij nga qytetarët para Kuvendit të Serbisë, sipas raportimeve që kërkojnë konfirmim.
Ironia e gjithë kësaj historie është e thjeshtë: Zurkoliqi humbi dy mandate, por e shpëtoi një edhe me votat e Preshevës. Organizatat fituan projekte në letër, por sipas burimeve ende nuk i kanë marrë paratë.
Në fund, Zurkoliqi e mori karrigen në Beograd, ndërsa në Luginë mbeti pyetja: Kush punoi për kë dhe kush mbeti me gishta në gojë?/LUGINALAJMI/

