Sipas agjencive amerikane të sigurisë, hakerët po shfrytëzojnë dobësitë në sistemet elektronike të kontrollit të temperaturës në supermarkete dhe magazina frigoriferike, veçanërisht në pajisjet që nuk kanë përditësime të sigurisë ose janë të lidhura drejtpërdrejt me internetin.
Në një deklaratë të përbashkët, Byroja Federale e Hetimit (FBI) dhe disa agjenci të tjera amerikane paralajmërojnë se sulmuesit mund të ndryshojnë temperaturën e pajisjeve, duke shkaktuar prishjen e produkteve ushqimore, rrezik për zjarr dhe dëmtime të sistemeve të ftohjes.
“Po shohim se këto sisteme po bëhen objekt sulmesh në sektorë të ndryshëm të infrastrukturës kritike në mbarë botën, duke vënë në rrezik produktet dhe pajisjet”, deklaroi Brett Leatherman, drejtor i Operacioneve të Degës së Sigurisë Kibernetike në FBI.
Paralajmërimi është publikuar në bashkëpunim me Agjencinë për Sigurinë Kibernetike dhe Infrastrukturën (CISA), Departamentin e Shëndetësisë dhe Shërbimeve Njerëzore, Departamentin e Bujqësisë dhe Departamentin e Transportit të SHBA-së.
Që nga mesi i tetorit, disa vende evropiane janë përballur me sulme të ngjashme ndaj sistemeve të ftohjes në supermarkete dhe biznese ushqimore. Si pasojë e këtyre ndërhyrjeve, temperaturat në pajisjet frigoriferike janë rritur, duke shkaktuar prishjen e produkteve.
Ndër vendet e prekura janë Franca, Belgjika, Suedia, Irlanda, Holanda, Estonia, Finlanda dhe Gjermania.
Në fillim të nëntorit, cak i një sulmi kibernetik ishte edhe një qendër franceze për ruajtjen e gjakut, ndërsa mediat amerikane raportojnë se autoritetet po hetojnë edhe disa incidente të ngjashme në SHBA.
Pas këtyre zhvillimeve, Komisioni Evropian ka thirrur një takim urgjent për të diskutuar situatën dhe rreziqet që paraqesin sulmet ndaj sistemeve të tilla.
Deri më tani, autoritetet nuk kanë bërë të ditur se kush qëndron pas sulmeve.