Partia “Lidhja Shqiptare” e Ziadin Selës ka reaguar ashpër ndaj deklaratës së kryetarit të Kuvendit, Afrim Gashi, i cili angazhimin për fitoren e një kandidati shqiptar në Bërvenicë e cilësoi si “provincializëm”.
Në reagimin e saj, partia thekson se kauza kombëtare nuk mund të quhet provincializëm, duke e akuzuar Gashin për nënshtrim politik dhe heqje dorë nga interesat kombëtare.
“Jemi të skandalizuar nga Afrim Gashi, i cili angazhimin e shqiptarëve për fitoren e kandidatit shqiptar në Bërvenicë e quan provincializëm, ndërsa njëkohësisht deklaron se dëshiron të fitojë më i miri”, thuhet në reagim.
Sipas “Lidhjes Shqiptare”, Gashi dhe koalicioni i tij po mbështesin një “fitore maqedonase” në Kërçovë dhe Bërvenicë, ndërsa shqiptarët, siç theksohet, po luftojnë për përfaqësimin e tyre politik.
Partia u ka bërë thirrje shqiptarëve të Bërvenicës të mobilizohen masivisht në zgjedhjet e së dielës, duke lënë mënjanë dallimet politike.
“Çështja kombëtare në Bërvenicë është çështje dinjiteti, arsyeje dhe demokracie, e jo provincializmi. Le të fitojnë kandidati shqiptar dhe qytetarët shqiptarë të Komunës së Bërvenicës”, përfundon reagimi i partisë së Ziadin Selës./Libertas.mk