Një grup që shpërndante drogë pranë shkollave u godit nga Policia e Fierit, pas disa muajsh hetime. 4 persona ranë në pranga ndërsa një tjetër është në kërkim.
Me vendim gjykate, arresti me burg u zbatua për Kevin Baren 28 vjeç, Dejvi Ferkon 25, Marjus Zhakën 48 dhe Taulant Çelën, 52 vjeç.
Gjatë kontrollit në banesat e të akuzuarve, policia gjeti 2.9 kg kanabis, që u sekuestrua në cilësinë e provës materiale, me 2 peshore elektronike dhe 4 aparate telefonike celularë.
Pas një hetimi disa mujor, të ndjekur me metoda speciale të hetimit, nga Sektori për Hetimin e Narkotikëve në DVP Fier, nën drejtimin e Prokurorisë së Juridiksionit të Përgjithshëm Fier, u bë i mundur dokumentimi i veprimtarisë kriminale të pjesëtarëve të një grupi që shpërndante lëndë narkotike në afërsi të institucioneve arsimore në qarkun Fier.
Bazuar në provat e siguruara, Sektori për Hetimin e Narkotikëve në DVP Fier, në bashkëpunim me Forcën e Posaçme “Shqiponja” dhe Seksionin e Mbështetjes Operacionale të Hetimit, finalizoi operacionin policor të koduar “Clean School”.
Gjatë operacionit u ekzekutuan 4 nga masat e sigurisë “Arrest në burg”, të caktuara nga Gjykata, konkretisht për shtetasit:
K.B., 28 vjeç, D.F., 25 vjeç, M.Zh., 48 vjeç dhe T.Ç., 52 vjeç, të katërt banues në Fier.
Ndërkohë, vijon puna për kapjen e shtetasit E.B., 38 vjeç, banues në Fier, ndaj të cilit është caktuar masa e sigurimit personal “Arrest në burg”.
Gjatë kontrolleve të ushtruara në banesat e personave të arrestuar, u gjetën dhe u sekuestruan në cilësinë e provës materiale 2.9 kg lëndë narkotike e dyshuar Cannabis Sativa, 2 peshore elektronike dhe 4 aparate telefonike celularë.
Materialet procedurale i janë referuar Prokurorisë për veprime të mëtejshme hetimore.