Ndërmjetësit nga Katari i kanë paraqitur Iranit të dielën një projektmarrëveshje të re për t’i dhënë fund luftës me Shtetet e Bashkuara dhe Izraelin. Sipas një zyrtari të informuar për negociatat, Teherani pritet të përgjigjet ndaj propozimit deri në fund të kësaj jave.
Drafti i ri parashikon një afat shtatëditor për trajtimin e shqetësimeve të Iranit dhe të Uashingtonit. Gjatë kësaj periudhe, të dyja palët do të duhet të ndërmarrin çdo ditë hapa për ndërtimin e besimit, tha zyrtari.
Procesi mund të nisë në fillim të javës së ardhshme, ndërsa disa shtete pritet të shërbejnë si garantuese të marrëveshjes, transmeton Telegrafi.
Katari dhe Pakistani kanë udhëhequr përpjekjet diplomatike për t’i dhënë fund luftës, të nisur në shkurt nga SHBA-ja dhe Izraeli.
Konflikti ka ndërprerë transportin detar dhe furnizimet globale me naftë, ndërsa është përhapur edhe në pjesë të tjera të Lindjes së Mesme.
Para takimit të së dielës në Teheran, kishte shqetësime se kryeministri izraelit, Benjamin Netanyahu, i cili po përpiqet të sigurojë një mandat tjetër në zgjedhjet e përgjithshme, mund të urdhëronte rifillimin e sulmeve ndaj Iranit gjatë kësaj jave, sipas zyrtarit të informuar për negociatat.
Të premten, presidenti amerikan Donald Trump përsëriti kërcënimet për sulme të reja ndaj Iranit. Ndërkohë, zyrtarë iranianë të sigurisë i thanë Reuters se Teherani kishte hartuar plane të detajuara për të sulmuar kabllot nënujore në Gjirin Persik, në rast se SHBA-ja dhe Izraeli rifillojnë sulmet.
Përpjekjet e mëparshme diplomatike ndihmuan në arritjen e një marrëveshjeje të përkohshme paqeje në qershor, por ajo u zhbë brenda një kohe të shkurtër.
Gjatë javëve të fundit, edhe rebelët Huthi në Jemen, të lidhur me Iranin, kanë kryer sulme të përsëritura ndaj Arabisë Saudite, eksportuesit më të madh të naftës bruto në botë.
Zhvillimet e fundit kanë shtuar shqetësimet për sigurinë rajonale dhe stabilitetin e furnizimeve globale me energji.