Real Madridi ka triumfuar 2:1 ndaj Barcelonës në “El Clasicon” e 265-të, falë dy golave të Kylian Mbappes.
“Los Blancos” ia kanë ndërprerë rivalit të madh synimin për t’u bërë skuadra e parë në historinë e La Ligës që fiton dhjetë ndeshjet e para të sezonit.
Përballja e zhvilluar në “Camp Nou” solli emocione deri në minutat e fundit, ndërsa Mbappe u bë vendimtar për madrilenët, duke shënuar golin e fitores vetëm tri minuta para përfundimit të kohës së rregullt.
Real Madridi e nisi ndeshjen më mirë dhe rrezikoi fillimisht përmes Arda Gulerit, i cili përfitoi nga një pasim i gabuar i Pedrit, por goditja e tij përfundoi mbi portë.
Barcelona pësoi një goditje në minutën e 30-të, kur Xavi Espart u lëndua dhe u zëvendësua nga Alejandro Balde.
Madrilenët vazhduan të kërkonin golin dhe ia dolën katër minuta para përfundimit të pjesës së parë. Pas një topi të larguar nga Gerard Martin, Mbappe u gjend në rrugën e topit, i cili përfundoi në rrjetë, duke i dhënë epërsinë Real Madridit.
Barcelona reagoi në pjesën e dytë dhe arriti ta barazonte rezultatin në minutën e 61-të. Raphinha përfitoi nga një aksion brenda zonës dhe me një goditje të saktë në këndin e largët e mposhti portierin Andriy Lunin, duke realizuar golin e tij të 15-të në të gjitha garat këtë sezon.
Pas barazimit, vendasit patën mundësi të kalonin edhe në epërsi, por Lunin bëri një pritje të shkëlqyer ndaj goditjes me kokë të Gerard Martinit. Edhe Lamine Yamal ishte pranë golit, por goditja e tij përfundoi ngushtë jashtë portës.
Kur dukej se ndeshja po shkonte drejt fundit me rezultat të barabartë, Real Madridi goditi sërish. Eduardo Camavinga fitoi duelin për topin e dërguar në thellësi dhe pasoi për Mbappen, i cili nga afërsia shënoi golin e dytë personal dhe të fitores për skuadrën madrilene.
Kjo fitore ishte e para për Real Madridin në fushën e Barcelonës që nga tetori i vitit 2023 dhe vetëm e dyta në tetë përballjet e fundit mes dy rivalëve, periudhë në të cilën katalunasit kishin regjistruar gjashtë fitore.
Me këtë triumf, Real Madridi mbetet në pozitën e tretë, por tashmë i afrohet Barcelonës në vetëm tri pikë. Për katalunasit, humbja ndërpreu serinë prej 23 fitoresh radhazi në ndeshjet e kampionatit në shtëpi.
Mbappe, me dy golat e tij, ishte figura kryesore e një “El Clasico’” që i dha fund synimit historik të Barcelonës dhe riktheu Real Madridin fuqishëm në garën për kreun e La Ligës.