Presidenti amerikan, Donald Trump, ka kritikuar ashpër homologun ukrainas, Volodymyr Zelensky, për rifillimin e sulmeve ndaj rafinerive ruse të naftës, duke i cilësuar ato si “turp” dhe duke e akuzuar Kievin se po kontribuon në rritjen e çmimeve të karburantit në tregjet ndërkombëtare.
Në një intervistë për rrjetin televiziv amerikan Newsmax, Trump deklaroi gjithashtu se është më e vështirë të bashkëpunosh me Zelenskyn sesa me presidentin rus, Vladimir Putin. Ai vuri në dyshim edhe gatishmërinë e udhëheqësit ukrainas për të arritur një marrëveshje që do t’i jepte fund luftës me Rusinë.
“Është për të ardhur keq! Ka kaq shumë objektiva të tjera”, u shpreh Trump, duke komentuar sulmet ukrainase ndaj infrastrukturës energjetike ruse.
Më tej, presidenti amerikan fajësoi Zelenskyn për ndikimin që këto sulme mund të kenë në tregun global të energjisë.
“E tëra çfarë bën është të rrisë çmimet e naftës në mbarë botën”, deklaroi ai.
Kritikat e Trump nuk u kufizuan vetëm te sulmet ndaj rafinerive. Presidenti amerikan vuri në pikëpyetje edhe qëllimet e Kievit në negociatat për përfundimin e luftës.
“Është më e vështirë të punosh me Zelenskyn sesa me Putinin”, tha ai, duke pretenduar se presidenti ukrainas nuk është realisht i gatshëm për një marrëveshje me Moskën.
“Ai thotë se po, por në realitet nuk po”, shtoi Trump.
Deklaratat e tij vijnë pas një sulmi me dronë nga Ukraina ndaj një rafinerie në rajonin rus të Ryazanit. Ky ishte sulmi i parë ndaj një objekti energjetik rus që nga njoftimi i Trump për një armëpushim energjetik mes Moskës dhe Kievit.
Nga ana e tij, presidenti ukrainas Volodymyr Zelensky njoftoi të enjten, më 15 tetor, se Ukraina do të rifillonte sulmet ndaj rafinerive ruse, pavarësisht armëpushimit energjetik të shpallur nga Trump.
Zelensky i bëri thirrje homologut amerikan të mos mbajë anën e Rusisë, të cilën Kievi e konsideron palën agresore në luftë.
Qëndrimet e kundërta të dy presidentëve nxjerrin në pah mosmarrëveshjet mes Uashingtonit dhe Kievit lidhur me strategjinë ushtarake të Ukrainës, sulmet ndaj infrastrukturës energjetike ruse dhe kushtet për arritjen e një marrëveshjeje paqeje.
Ndërkohë, përpjekjet për t’i dhënë fund luftës vijojnë, por mbetet e paqartë nëse palët do të arrijnë një marrëveshje për armëpushim të qëndrueshëm./TCH