Një ditë pas fitores në zgjedhjet për Këshillin Kombëtar Shqiptar (KKSH), kryetari i Partisë për Veprim Demokratik (PVD), Shaip Kamberi, ka dalë me një propozim që askush s’e priste, atë të bashkimit të të gjitha subjekteve politike në drejtimin e këtij institucioni.
Zgjedhjet për KKSH, të mbajtura të dielën, më 8 nëntor, nxorën fituese, sipas rezultateve preliminare, listën e përbashkët të PVD-së dhe Aleancës për Luginën, me bartës Enkel Rexhepin, e cila mori 4.769 vota dhe siguroi 10 mandate. Në vendin e dytë u rendit koalicioni LPD-PDSH me 4.225 vota dhe 8 mandate, pasuar nga Alternativa për Ndryshim (APN) me 2.876 vota dhe 6 mandate, ndërsa koalicioni PD-LR mori 2.753 vota dhe 5 mandate.
Megjithatë, vetëm një ditë pas procesit zgjedhor, Kamberi ka bërë një propozim që shkon përtej krijimit të një shumice të zakonshme qeverisëse, duke ftuar të katër listat garuese të bëhen pjesë e drejtimit të ardhshëm të KKSH-së, pa ndarje ndërmjet pozitës dhe opozitës.
Në reagimin e tij publik, Kamberi ka rikujtuar se brenda dy javëve shqiptarët në Serbi kanë kaluar nëpër dy procese zgjedhore, atë parlamentar të 25 tetorit dhe zgjedhjet për KKSH të 8 nëntorit.
“Frymën e bashkimit që na dha rezultat në zgjedhjet parlamentare le ta shtrijmë edhe në Këshill”, ka shkruar Kamberi.
“Si kryetar i Partisë për Veprim Demokratik, i ftoj të gjitha listat të bëhemi bashkë e ta ndajmë përgjegjësinë për drejtimin e KKSH”, ka deklaruar ai.
Kamberi ka kërkuar njëkohësisht respektimin e rezultatit zgjedhor dhe të peshës politike që qytetarët i kanë dhënë secilës listë.
“Sipas numërimit preliminar, lista jonë me numër 3, me Enkel Rexhepin në krye, mori më së shumti vota. Ta respektojmë parimin e fituesit dhe peshën që qytetarët ia dhanë secilës listë”, ka theksuar ai.
Kamberi, shkroi se të katër listat duhet të përfshihen në vendimmarrje, pavarësisht numrit të mandateve, duke nënvizuar se “jemi të përkushtuar që në KKSH të mos ketë opozitë”.
Propozimi i kreut të PVD-së tashmë e zhvendos vëmendjen nga rezultati zgjedhor te formimi i drejtimit të ardhshëm të KKSH-së. Mbetet të shihet nëse subjektet e tjera politike do t’i përgjigjen pozitivisht ftesës për një qeverisje gjithëpërfshirëse të këtij institucioni./LUGINALAJMI/

