Një banesë është shkrumbuar nga flakët në fshatin Hoxhar i Vjetër në Fier. Shkak i zjarrit dyshohet të jetë bërë një bombol gazi që përdorej për gatim, ndërsa fatmirësisht 33-vjeçari që ndodhej brenda banesës ka shpëtuar pa lëndime.
Sipas banorëve të zonës, Redjan Llambro, i cili vuan nga epilepsia, në momentin që ka ndezur bombolën e gazit për të gatuar, ka pësuar një krizë epileptike dhe ka humbur kontrollin. Gjatë kësaj kohe ka rrëzuar edhe bombolën, ndërsa flakët janë përhapur me shpejtësi në orenditë dhe ambientet e banesës.
Kanë qenë fqinjët ata që kanë konstatuar tymin që dilte nga shtëpia dhe kanë ndërhyrë menjëherë, duke nxjerrë prej saj 33-vjeçarin. Pak minuta më vonë, në vendngjarje kanë mbërritur edhe forcat zjarrfikëse, të cilat kanë bërë të mundur izolimin e flakëve dhe parandalimin e përhapjes së zjarrit në banesat përreth.
LEXO EDHE: Librazhd, makina përfundon në humnerë/Një pistoletë në mjetin e dëmtuar!
Në këtë banesë jetonin Redjan Llambro së bashku me nënën e tij, e cila në momentin e rënies së zjarrit nuk ndodhej në shtëpi. Përveç dëmeve të mëdha materiale, familja tashmë përballet edhe me humbjen e të gjitha orendive dhe pajisjeve shtëpiake.
Të afërmit dhe fqinjët e familjes Llambro bëjnë apel për ndihmë dhe solidaritet, pasi nëna dhe i biri jetojnë në kushte të vështira ekonomike dhe, pas kësaj ngjarjeje, kanë mbetur pothuajse pa asgjë.
Ata kërkojnë mbështetjen e institucioneve dhe të qytetarëve për t’i ardhur në ndihmë kësaj familjeje, e cila ka nevojë urgjente për strehim dhe pajisjet bazë të jetesës.
LEXO EDHE: Transportonin 4 emigrantë ilegalë, pranga dy të rinjve në Gjirokastër-Tepelenë!