Sali Berisha sërish akuza Edi Ramës se ka ndërmarrë rritjen e taksave pa paralajmërim dhe pa konsultim publik. Për kryetarin demokrat është “mashtrim” pretendimi i qeverisë se përmes këtyre ndryshimeve, buxheti do të arrijë në 10 miliardë euro.
Paketa është goditje e rëndë për më të varfrit, për bizneset e vogla, për shtresën e mesme. Paketa që në aparencë do të ulë çmimet e ushqimeve bazë, duke futur në fashën e TVSH-së të gjithë dyqanet, në të vërtetë, i detyron ato të rrisin me 6% çmimet, i detyron shqiptarët të paguajnë 6% më shumë se ç’paguajnë tani.
Dhe ky është një akt shumë i papërgjegjshëm. Nëse Edi Rama donte të lehtësonte qytetarët nga taksat e ushqimeve, të vendoste mekanizmin e kompensimit të plotë të çdo kilogrami, të çdo grami që blihet në dyqane në kuadrin e 52 mallrave që ka shpallur se iu ul TVSH-në.
Së dyti, prapë prek më të varfrit, sepse nëse uli TVSH-në për 52 mallra, e rriti TVSH-në për 5 mijë mallra të tjerë, që çdo ditë e më shumë bëhen mallra të ndaluar për të varfrit e këtij vendi.
Së treti, shqiptarët, analistët, si edhe ekspertët e huaj, kanë konstatuar një paradoks: rritjen më të madhe të çmimeve në Shqipëri se sa në çdo vend tjetër, rritje e cila në studim tregon se është në përpjesëtim të zhdrejtë me rritjen e pagave. Pagat rriten, por më shumë rriten çmimet.
Çfarë ndodh? Sigurisht që kjo ka shumë shkaqe, por shkak ndër më kryesorët janë paratë e drogës.
Sa i përket biznesit të vogël, kryedemokrati pretendoi se rreth 18 mijë biznese rrezikojnë falimentimin për shkak të ndryshimeve në fashën e TVSH-së.
Në çdo lëvizje dhe rrethanë, ai që ndëshkohet është i varfri. Çmimin e paketës fiskale të Edi Ramës e paguan biznesi i vogël. Me hyrjen e saj në fuqi, rreth 18 mijë biznese të vogla shkojnë drejt falimentimit sepse futen në fashën e TVSH-së.
Edi Rama vë nivelin më të ulët të xhiros, për të vendosur TVSH mbi bizneset. I godet ato në mënyrë fatale. Jo vetëm do të rrisin çmimet, por ato shkojnë drejt falimentimit.