Për vitin shkollor 2026/2027, përmes Këshillit Kombëtar Shqiptar janë shpërndarë 37.429 libra falas për 3.686 nxënës shqiptarë në 15 shkolla fillore në Preshevë, Bujanoc dhe Medvegjë.
Kryeministri i Kosovës, Albin Kurti, tha se mbështetja për arsimin në gjuhën shqipe do të vazhdojë, pavarësisht se, sipas tij, Serbia gjatë këtij viti ka bllokuar dhe refuzuar mjete të Qeverisë së Kosovës të dedikuara për shqiptarët e Luginës.
“Mbështetja jonë për arsimin në gjuhën shqipe është e qëndrueshme. Shqiptarët e Luginës nuk janë vetëm”, shkroi Kurti.
Ndërkohë, kryetari i Këshillit Kombëtar Shqiptar, Enkel Rexhepi ka shpërndarë sot tekstet për nxënësit shqiptarë në Medvegjë, duke përmbyllur kështu shpërndarjen e librave falas për nxënësit e shkollave fillore në Luginën e Preshevës./LUGINALAJMI/