Vëmendje të veçantë në shtypin kroat i kushtohet edhe futbollistit me prejardhje shqiptare, Brajan Gruda, i cili debutoi me shumë sukses në kombëtaren e Gjermanisë.
Ishte një debutim ëndrrash, i kurorëzuar me një gol të bukur nga rreth 17 metra, në këndin e poshtëm të majtë të portës, në stadiumin “Rajko Mitiç”, i njohur dikur si “Marakana”.
Ndërsa shumica e mediave ndërkombëtare aksionin e Grudës e përshkruajnë si një depërtim prej 50 metrash, mediumi kroat “Gol.dnevnik.hr” shkruan se ai përshkoi 40 metra me topin në këmbë.
Mediumi kroat e shoqëron lajmin me titullin: “Gjermani me prejardhje shqiptare luan me serbët në ‘Marakana’ – përshkon 40 metra me topin në këmbë dhe shënon një gol spektakolar”.
“Reprezentuesi gjerman Brajan Gruda e shënoi në mënyrë spektakolare debutimin e tij me Kombëtaren A të Gjermanisë, duke realizuar një gol të mrekullueshëm kundër Serbisë në ‘Marakana’ të Beogradit.
Gjermania e gjeti një hero të ri në ndeshjen si mysafire ndaj Serbisë në Ligën e Kombeve. Brajan Gruda, futbollisti 22-vjeçar me rrënjë shqiptare, debutoi për herë të parë me kombëtaren seniore të Gjermanisë.
Ai u përfshi menjëherë në formacionin titullar, mori fanellën prestigjioze me numrin 10 dhe e zbukuroi debutimin e tij me një gol për t’u mbajtur mend”, shkruan media kroate “Gol.dnevnik.hr”
Minuta e 50-të solli një aksion spektakolar, kur Gruda e mori topin në gjysmën e fushës së tij dhe nisi një depërtim të jashtëzakonshëm.
Ai iu shmang presionit të disa futbollistëve serbë, përshkoi rreth 50 metra me topin në këmbë dhe arriti deri në hyrje të zonës së rreptësisë, prej nga me një goditje të bukur dhe të saktë e mposhti Vanja Milinkoviq-Saviqin për epërsinë 0:3 të Gjermanisë.
Debutim ëndrrash në stadiumin e famshëm
“Është interesante se paraqitja e tij e parë me ekipin senior erdhi pikërisht kundër Serbisë, një përfaqësuese ndaj së cilës ndeshjet shpesh kanë simbolikë të veçantë për futbollistët me prejardhje shqiptare.
Futbollisti 22-vjeçar la që futbolli i tij të fliste në fushë.
Paraqitja e parë, fanella me numrin 10 dhe goli spektakolar për rezultatin 0:3, pas një depërtimi individual, vështirë se mund të përbënin një fillim më të mirë të karrierës së tij ndërkombëtare. Zgjedhja e Gjermanisë tashmë po dëshmohet si vendim i qëlluar”, shkruan media kroate.

