Franca do të zbresë në fushë kundër Belgjikës me disa ndryshime në formacionin titullar. Trajneri i “Les Bleus”, Zinedine Zidane, ka konfirmuar se do të ketë rotacion, me synimin për të menaxhuar sa më mirë ngarkesën fizike të lojtarëve.
Pas barazimit 1-1 ndaj Italisë, të premten, Franca përgatitet për ndeshjen e katërt radhazi në një periudhë të ngjeshur. Për këtë arsye, Zidane pritet t’u japë hapësirë edhe futbollistëve të tjerë të grumbulluar.“Do të ketë ndryshime, kjo është e sigurt”, deklaroi Zidane në konferencën për shtyp, duke nënvizuar rëndësinë e menaxhimit të minutave.
Tekniku francez kërkon që i gjithë grupi të ndihet i përfshirë dhe të jetë gati për të kontribuar në çdo moment.
“Çdo lojtar është i rëndësishëm për këtë skuadër. Dua që ata ta kuptojnë këtë dhe dua të kem mundësi të mbështetem te të gjithë. Ky menaxhim është i domosdoshëm për të ruajtur gjendjen fizike dhe formën e skuadrës”, u shpreh trajneri.
Franca aktualisht kryeson grupin me 7 pikë, ndërsa Belgjika ndjek me 6 pikë dhe Italia me 4 pikë. Përballja me belgët pritet të jetë vendimtare në garën për kreun e grupit.
Zidane kërkon që grumbullimi të mbyllet në mënyrën më të mirë të mundshme, duke synuar fitoren në sfidën e radhës.
“Ka qenë fantastike të jem me lojtarët. Tani duhet të bëjmë edhe një përpjekje të fundit. Do të ishte fantastike ta mbyllnim me një fitore”, përfundoi Zidane.