Pavarësisht presionit të shtuar diplomatik nga institucionet e Bashkimit Evropian, Sofja vazhdon të qëndrojë në pozicionet e saj dhe nuk planifikon lëshime ndaj Maqedonisë së Veriut.
Në debatet politike në Bullgari theksohet se çështja e Maqedonisë së Veriut është një nga temat e rralla ku ekziston konsensus mes partive politike, pavarësisht përçarjeve të tyre në çështje të tjera.
Sipas qëndrimeve bullgare, Brukseli po kërkon zbutjen e kushteve dhe zhbllokimin e procesit, por Sofja insiston se nuk duhet të bëjë kompromis nën presionin evropian.
Ndër kërkesat kryesore mbeten përfshirja e bullgarëve në Kushtetutën e Maqedonisë së Veriut dhe zbatimi i konkluzioneve të Komisionit të Përbashkët për Çështjet Historike.
Analistët bullgarë vlerësojnë se çdo tërheqje nga këto kërkesa do të dëmtonte interesat kombëtare të Bullgarisë. Për këtë arsye, Sofja pritet të vazhdojë të kërkojë përmbushjen e kushteve para se Shkupi të marrë dritën jeshile për përparim të mëtejshëm në procesin e integrimit evropian.