-Foto ilustrim-
Kryeministri i Republikës së Kosovës ka ftuar për sot, në orën 17:00, përfaqësuesit politikë dhe institucionalë të shqiptarëve të Preshevës, Bujanocit dhe Medvegjës në një takim në Qeverinë e Kosovës.
Siç mëson LUGINALAJMI, temë kryesore e takimit pritet të jetë unifikimi i spektrit politik shqiptar të Luginës së Preshevës dhe mundësia e pjesëmarrjes me një listë të përbashkët në zgjedhjet e parakohshme parlamentare në Serbi.
Megjithatë, çështja e bashkimit të partive shqiptare mund të hapë edhe diskutime rreth situatës politike në Bujanoc dhe koalicionit aktual qeverisës, pjesë e të cilit janë Alternativa për Ndryshim (APN), Partia Progresiste Serbe (SNS) dhe partnerë të tjerë.
Ditë më parë, kryetari i Lëvizjes së Progresit Demokratik (LPD), Shqiprim Musliu, kërkoi që bashkimi i shqiptarëve të mos kufizohet vetëm në zgjedhjet parlamentare, por të nisë pikërisht nga Bujanoci, me krijimin e një shumice të re shqiptare në Kuvendin Komunal.
“Nuk duhet të harrojmë se para dy vitesh, si Tirana ashtu edhe Prishtina, bënë thirrje për një listë gjithëshqiptare për ta mbrojtur Bujanocin. Unë jam plotësisht për një listë të përbashkët, sepse vetëm të bashkuar mund të kemi më shumë peshë dhe zë”, ka shkruar Musliu.
Sipas tij, bashkimi në nivel parlamentar duhet të paraprihet nga një marrëveshje mes subjekteve shqiptare në Bujanoc.
“Çfarë kuptimi do të ketë në parlamentare të bashkuar, e në lokale të përçarë? Prandaj, hapi i parë duhet të jetë këtu, në Bujanoc: të ulemi bashkë, të gjejmë gjuhën e përbashkët dhe të bëhemi një. Pastaj, si të bashkuar, mund të mendojmë për çdo hap tjetër. Përçarja nuk na çon përpara, bashkimi na jep forcë”, ka deklaruar Musliu.
Se sa koalicioni aktual APN–SNS dhe partnerët e tjerë në Bujanoc mund të ndikojnë në negociatat për krijimin e një liste të përbashkët shqiptare, pritet të bëhet më e qartë pas takimit të sotëm në Qeverinë e Kosovës.
Takimi vjen në një moment kur partitë shqiptare kanë nisur konsultimet për mënyrën e pjesëmarrjes në zgjedhjet parlamentare të 25 tetorit, ndërsa Alternativa për Ndryshim tashmë ka bërë thirrje publike që subjektet shqiptare të garojnë së bashku në një listë të vetme./LUGINALAJMI/