UEFA ka konfirmuar se ka pranuar një sasi të konsiderueshme dokumentesh të dorëzuara nga Real Madridi lidhur me “rastin Negreira”, në të cilin po hetohen pagesat e Barcelonës ndaj José María Enríquez Negreiras, ish-zëvendëspresident i Komitetit Teknik të Arbitrave në Spanjë.
Real Madridi i ka kërkuar UEFA-s që hetimi të përshpejtohet. Klubi madrilen ka dorëzuar një dosje me dokumente që, sipas tij, lidhen me pagesat e bëra nga Barcelona ndërmjet viteve 2001 dhe 2018. Sipas Prokurorisë spanjolle, pagesat kanë kaluar shumën prej 7 milionë eurosh, ndërsa Barcelona ka deklaruar se ato kishin të bënin me raporte dhe këshillime teknike për arbitrat, përcjell Pa Censurë.
UEFA kishte nisur procedurë ndaj Barcelonës në vitin 2023, por në korrik të po atij viti e pezulloi atë. Barcelona u lejua të merrte pjesë në garat evropiane, ndërsa UEFA ruajti të drejtën për ta rihapur procedurën dhe për të marrë më vonë një vendim për përjashtimin ose pranimin e klubit.
Sipas raportimeve të sotme, procedura nuk është hapur nga e para, por ka qenë e pezulluar dhe mund të riaktivizohet në bazë të gjetjeve të inspektorëve të Etikës dhe Disiplinës të UEFA-s. Edhe Barcelona ka reaguar duke theksuar se hetimi nuk është mbyllur asnjëherë dhe se klubi ka bashkëpunuar me UEFA-n.
Nëse UEFA arrin në përfundimin se Barcelona ka shkelur rregullat përkatëse, përjashtimi nga garat evropiane, përfshirë Ligën e Kampionëve, është një nga masat që mund të shqyrtohen, por nga informacionet e disponueshme aktualisht nuk rezulton se UEFA ka marrë tashmë vendim për përjashtimin e Barcelonës, transmeton Pa Censurë.
Rregulloret e UEFA-s parashikojnë mundësinë e përjashtimit nga gara në rrethana të caktuara, ndërsa në rastin e Barcelonës procedura është ende në fazën e hetimit.