Ish-nënkryetari i Organizatës së Veteranëve të Luftës së UÇK-së, Nasim Haradinaj, ka bërë thirrje për unitet të deputetëve të Kuvendit të Kosovës, ndërsa nga protesta në Prishtinë kritikoi mënyrën se si, sipas tij, ndërkombëtarët kanë trajtuar çështjet që lidhen me luftën e Ushtrisë Çlirimtare të Kosovës.
Ish-nënkryetari i OVL-UÇK-së, Nasim Haradinaj, ka mbajtur fjalim para protestuesve në sheshin e Prishtinës, ku ka kërkuar drejtësi dhe zbardhjen e krimeve të kryera gjatë luftës në Kosovë.
Duke iu drejtuar deputetëve të Kuvendit të Kosovës, Haradinaj kërkoi që ata të bashkohen dhe të marrin përgjegjësinë që, sipas tij, u takon.
“Ju 100 deputetët që jeni atje, të 100-tit, secili me përgjegjësinë e vet dhe me peshën që ka kërkuar vetë me u ngarku, qoftë të votës, qoftë të premtimeve, ju thërrasim për bashkim! Bashkim! Bashkim!”, tha Haradinaj.
Haradinaj pati një mesazh edhe për komunitetin ndërkombëtar, duke thënë se besimi i qytetarëve të Kosovës ndaj tyre ishte ndërtuar mbi mbështetjen që, sipas tij, i ishte dhënë luftës së UÇK-së.
“Ndërkombëtarët, që ju besuam sepse i patëm bindur të na ndihmojnë në luftën e UÇK-së dhe bashkë të fitojmë. Ata u ndanë pa viktima sepse ne na kishin këtu. Ata morën mburrjen, ne morëm lirinë. Por tani ju themi: Na keni tradhtuar dhe na ktheni besimin!”, deklaroi ai.
Ai tha se kërkesa e protestuesve është për drejtësi dhe zbardhje të krimeve, duke kundërshtuar, siç u shpreh, keqpërdorimin e rasteve që lidhen me luftën.
“Ne kërkojmë vetëm drejtësi! Drejtësi dhe zbulim të krimeve patjetër, sepse shumë herë po mundohen ta keqpërdorin. Kosova ka ngritur institucione, ka njerëz profesionalisht që drejtësinë ta çojnë në vend”, u shpreh Haradinaj.
Ai kritikoi gjithashtu trajtimin e rasteve që lidhen me viktimat e luftës, duke thënë se nuk pranon që masakrat dhe viktimat civile të trajtohen si raste individuale.
“Ndërkombëtarë nuk mund të mashtroni se janë raste individuale. Nuk pranojmë të ofendohen 400 të ekzekutuarit në masakra, nuk pranojmë të ofendohen fëmijët tanë, nuk pranojmë të ofendohet gjaku ynë!”, tha Haradinaj.
Në fund të fjalimit, ai bëri thirrje për unitet rreth UÇK-së dhe iu drejtua ish-pjesëtarëve të UÇK-së që aktualisht ndodhen në Hagë.
“Rroftë UÇK-ja! Nga sot e tutje, të gjithë UÇK! Lavdi dhe shokëve atje në Hagë ju përshëndes! Nasimi, që ju jeni në Hagë e këta këtu, ose do t’ju sjellim juve këtu, ose do të vijmë atje! Rroftë UÇK-ja”, përfundoi Haradinaj.