Komuna e Bujanocit është përzgjedhur në mesin e nëntë komunave në Serbi që do të përfitojnë nga një projekt i mbështetur nga Qeveria e Emirateve të Bashkuara Arabe, i cili parasheh renovimin dhe digjitalizimin e Qendrës së Asistencës dhe krijimin e një qendre unike administrative.
Këtë e ka bërë të ditur kryeshefi i Administratës komunale të Bujanocit, Selami Mustafa, i cili së bashku me kryeshefin e drejtoratit për Administratë të përgjithshme, Kastriot Jakupi kanë qëndruar për një vizitë zyrtare treditore në Dubai, në lidhje me projektin që i është ndarë komunës së Bujanocit.
Sipas Mustafës, përveç Bujanocit, komunat dhe qytetet e përzgjedhura janë Subotica, Kragujevci, Zrenjanini, Pançeva, Zajeçari, Priboji, Prijepolja dhe Lloznica.
Projekti synon modernizimin dhe digjitalizimin e shërbimeve të administratës lokale, në mënyrë që qytetarëve t’u ofrohen shërbime më të shpejta, më efikase dhe më cilësore në një vend të vetëm.
Sipas njoftimit të kryeshefit Selami Mustafa, realizimi i projektit është paraparë gjatë vitit 2027./LUGINALAJMI/
